المبدعين والفن الشعبى فى الواحات البحرية

يلى قاعدين مساكم الله بالخير وعجب عليكم العافية طيات

بعد السلام نبدأ الكلام نقول ونحكى عن الواحات

الاسم فى البطاقة الشخصية الواحات البحرية

الهوية جيزوية العيلة فى الاصول رمل وصخور لكن فى الحق

بساتين وناس طيبين

اسمعونى يا اهل البندر ومتزعلوش منى

يلى خلاص نسيتو الجلبية وخلعتوا الطاقية

ارجعوا للحق تعالوا وشوفوا الخلج بتفلج فى الصخور فلج

لجل ما تطلع نقطة ميه لجل ما تروى عطشها بنية لجل متعود الحياة

وساعة الصلاه تلاجى الكل راكع لله

ادى الحياه ادى الواحات لا خلو يقطمنا ولا خيمة تعرينا النخلة تطعمنا والعين بتروينا شوف ربك يا مصرى لما يكرمنا

هذه كلمات مبدع من مبدعى الشعر والمسرح فى الواحات البحرية رحمة الله الاستاذ / محمد حكم امام نسأل الله له الجنة

الواحات البحرية مليئة بالمبدعين فى مجالات عديدة ومن اهم هذه المجالات الشعر والفن الشعبى الواحى الاصيل الذى قل ما نجده فى المدن فى الواحات البحرية لون مختلف تماماً لفرقة الفنون الشعبية التابعة لبيت ثقافة الباويطى فكل من زار الواحات وتمتع برؤية هذه الفرقة المبدعة الذى تقدم لون مختلف من شتاوة وموال وغناء ورقص واحى على انغام الستاوية والمجرونة والارغول ورغم حصدها الى العديد من الجوائز فى كل مهرجان ينظم من قبل الثقافة الجماهيرة الا انها لا تجد سواء الاهمال من قبل هؤلاء المسئولين فلك ان تتصور ان فرقة بهذا الجمال تحضر اللاتها من جيوب اعضاء الفرقة وهذه نقطة سوداء فى ثوب الهيئة العامة لقسور الثقافة اه اقصد لقصور الثقافة ولا حقناً نكتب بعض مما تقدمة الفرقة كما اننا سوف نقوم بعض الفييديو الخاص بعروض هذه الفرقة

يوميات مواطن واحاتى

ونرجع بعد زمن من السفر الطويل ونخش على الواحات البحرية بعد ما نسلم على اهلها الطيبين ونقول السلام عليكم يا اهل الواحة
شو يا صحبى الحال اتغير كتير وبعد ما كان مفيش حد يعدى على جماعة الا ويلقى السلام الان زى كل الدنيا ما اتغيرت احنا اتغيرنا كتير
زمان لما كان يموت حد الواحة كلها تحزن عليه ومفيش فرح يتعمل الا بعد سنه ويستأذن اهل الميت علشان يوافقوا على هذا الفرح ولكن الان اتغيرنا والميتم جنب الفرح والعملية زاطت
المهم لاهل الواحة عادات جميلة لسة عايشة جواهم ومن اهم هذه العادات المواساه فى المياتم ولازم الكل يذهب ويدفن الميت كذلك الفرح المجاملة فى الافراح ولزم الكل يحضر الفرح او الغالبية
كذلك الصلاه والتمسك بالعبادات احسن من القاهرة كتير بعد الفرح الواحى القديم نعيش شوية مع يوميات رجل واحاتى يعمل اية الى اين يذهب وازاى يقضى يومة
الفلاح البسيط يقوم من النوم بدرى يفطر هو وام الاولاد ثم تتاوى له الضحى ( يعنى تحضر له كام من الخبز الناشف فصوص على كام حبة كشك وطماطماية وفلفل وسكر وشاى ) ويذهب الى الغيط بالمصرى الحقل ويذهب على الحمار ومعة القفاف ثم ينزل يسقى زرعة ويعود قبيل صلاه الظهر الى سقيفة مجهزة فى الحقل يتجمع فيها بعض من الفلاحين جيرانة وكلاً معة طعامة يقومو بتجهيز هذا الطعام ويضحوا ويشربو الشاى الواحى ( 2 كوب شاى صغير واحدة من غير نعناع وشاى زيادة سكر خفيف والاخرى بنعناع شاى خفيف سكر زيادة ) ثم يصلوا الظهر وبعد ذلك يستريح من عناء الشمس ويعود العصر كى يحش برسيم ثم يعود الى منزلة على اذان المغرب يتعشى ويناعم ليقوم فى صلاه الفجر وهكذا الحياه البسيطة للفلاح .
طائفة اخرى اصحاب المحال التجارية يفتح كل واحد محالة من التاسعة حتى الواحدة والنصف ظهراً من الواحدة والنصف لا تجد محال فى الواحات مفتوح قليل جداً حتى الخامسة عصراً يفتح مرة اخرى حتى الحادية عشر مساءً
ابقى معى سوف اعود بعد قليل

الفرح

نكمل مع بعض ده فى الماضى طبعاً وبعد ما يوافق ابو العروسة على ذلك يتم الاتفاق على قراءة الفاتحة فى يوم ما فيحضر اهل العريس الاب والاعمام والخلان والاقارب من اهل العروسة اعمامها وخيلانها ويتم عمل وليمة او عزومة كبيرة وبعد العزومة يتم قراءه الفاتحة وفى اليوم الثانى يتم دعوة العريس لعزومة اخرى ولكنها من نوع مختلف عن اى عزومة تتخيلها فى حياتك يذهب العريس فى اليوم الثانى ومعة اصحابة وايضاً والدتة واخوتة وزوجات من ذهب من الرجال فى اليوم الاول
ويوضع طعام العريس واصدقائة معلش استجملنى شوية هذه الوجبة تتكون من اولاً الشوربة وهذا عادى وبعد ذلك الخضار يعنى البامية الفاصولية الكفتة السلطات بانواعها الملوخية المخللات وبعد ذلك يوضع الارز والمحشى بانواعة ورق عنب وباذنجان وفلفل وكرنب كما يوضع رقائق الرقاق المحشوة باللحم والبطاطس المحشى باللحمة والارز الواحى والحوم لحمة بلدى خمسة كيلو على الاقل وديك رومى ضخم حوالى ستة كيلو وعلى عدد الافراد يوضع حمام محشى فريك او ارز ودكر بط بلدى وعدد 2 فرخة بيضاء صدقنى ده كلة فعلاً وبعد ذلك تأتى دور الفاكهة والحلو بسبوسة كنافة جلاش حسب الفاكهة الموجودة بالاسواق والمياه الغازية غالباً السفن ثم بعد ذلك الشاى الواحى دورين اولى بدون نعناع وثانية بالنعناع ثم العصير ويدفع الصديق والعريس بعض النقوط للعروسة ثم ينصرفوا الاصدقاء ويظل العريس بعض الوقت ثم ينصرف على ان يعود فى اليوم الثانى فى فترة الضحى فيضحى ثم يتغداء ثم ينصرف وبعد ذلك يتم تحديد يوم الزفاف بين ابو العروسة وابو العريس وهنا كان فى الماضى سبع ليالى يتم فيهم ذبح العجل او العجلين ويتم عزومة اهل الواحات جميعاً وتقام الافراح على الطبل والمزمار البلدى والمطرب الصحراوى ولون الواحات الجميل وتتم الشبكة فى اليوم الاول ثم يذهب العريس وفى اليوم الثانى بعد الظهر او بعد العصر تتم الدورة او الزفة من منزل العروسة الى منزل العريس الذى كان فى الماضى عبارة عن حجرة فى منزل والدة يتم تجهيزها بابسط الاشياء ده كلة كان فى الماضى خلى بالك الحال اتغير كتير الان خليك معايا شوية مترحش بعيد هنكمل بع الفاصل

معرفة جزء من السياحة فى الواحات وبداية الفرح

ووصلنا لحد السياحة وما ادراك ما السياحة ونتطرق لها تفصيلياً فيما بعد
نرجع بقا للواحات وحكايتها وعيشتى فيها شوف يا صحبى زى معرفت الدنيا فى الصيف حر جداً جداً صحرا يا با صحراء ولكنى للحق يتقال بليل وفى الصحراء الجو جميل وبديع وتتمنى الوقت كلة ليل دة فى الصيف طبعاً تطلع يا صحبى على غرود الرملة ومكاك الميه الساقعة والفراج والحطب والشواية والشاى والسودانى شهيتك انا مش كده اتفضل معايا وتعيش لطلوع الفجر دنيا تنيه خالص
ولا بالنهار لو حبيت تروح الغيط والاشجار والميه الجارية ( عيون كبريتية ) ودى من ضمن السياحة العلاجية المهم نرجع لمرجوعنا بعد السهر اه نسيت اقولك اننا ممكن نسهر على انغام الارغول والستاوية والطرب تبقى ليلتك ليلة
خليك معايا شوية وركز الواحات مفيهاش دور سنما ولا حدائق حيوان ولا كافى شوبات يادوب كام قهوة على كافتريا اولاد راشد والحمد لله النسوان مفيش اى جهة ترفيه اللى قليل ما يطلعوا مع الاولاد والازواج بعض الوقت فى الصحراء للسهرى اما فى الشتاء زى ما اسردنا من قبل فالبرد شديد جداً فى الليل اما فى النهار معتدل بس تكتر الرحلات السفارى فى الشتاء ونار الشتاء الجميلة متعة ما بعدها متعة
المهم معندناش غير مصانع البلح وزيت الزاتون والاعتمد على المحال التجارية وبعض السنترالات الاهلية ولكن الواحات تمد مصر بحاجة مهمة جداً جداً جداً وهى مناجم الحديد والصلب
فهى من اهم المناطق فى مصرنا الغالية وهى بوابة الواحات البحرية من الناحية الشرقية بلدنا جميلة رغم موقعها فى الصحراء
حاجة كده من حكايات الف ليلة وليلة
بص وشوف شباب الواحات البحرية شباب كويس متدين الى حد كبير مفيش حاجة افسدتة الا موضوع السياحة والموبايل زى اى مجتمع فيه الوحش وفيه الحلو لكن الحلو اكتر بكتير .
الشباب والالتزام من الماضى الى الحاضر
يعنى من عادات اهل الواحات القديمة كان الواحد يعنى الشاب اول ما يكبر ويحب يتجوز مينفعش يقول لابوة وانما يبعت لابوه عمة او خالة او اى حد من الاهل وبعد كدة يقرر ابوة ويعرض الخال او العم على الشاب بعض الفتايات عرض اسماء وليس عام لاننا فى الواحات الكل عارف بعض فيتفق الخال مع الشاب على اسم معين وغالباً من العيلة ويعر على الوالد يوافق ويبارك الزواج ويذهب الاب واحد اخوتة بعن ان يكون اخذ رأى ابو الفتاه فاذا وافق يذهب الاب واحد الاعمام واحد الاخوال للكلام على هذه الفتاه فيوافق ابو العروسة وهنا لا مجال للمناقشة فى هذا الموضوع من الفتاه هذا فى الماضى خلى بالك كويس الزمن اتغير النهاردة خلينا فى الماضى شوية ... مترحش بعيد هنكمل

الواحات البحرية

الواحات البحرية ......

بلد فى قلب الصحراء الغربية الغربية من ضمن عدد خمس واحات موجودة فى الصحراء الغربية وهى واحة سيوه واحة الفرافرة واحة الخارجة واحة الداخلة والواحات البحرية

درجة الحرارة فى الصيف حار جداً فى الشتاء بارد جداً

المطر خفيف او يكاد يكون منعدم

تبعد عن القاهرة 360 كم تتبع الان محافظة 6 اكتوبر

اهم الصناعات الزراعة وصناعة البلح وزيت الزيتون

اما اهم ما يميزها السياحة وهى قطاع كبير وغويط تغوص فيه

منها السياحة للسياحة ومنها السياحة للجنس واخرى السياحة لاكل العيش

انواع كتير ولكن الاهم السياحة لاكل العيش

المزارات الموجودة

مزارات اثارية - مزارات طبيعية - مزارات علاجية ( السياحة العلاجية )

الاثار اهم ما يمزها وادى المومياوات الذهبية فهى اكبر تجمع للمومياوات الزهبية فى الشرق الاوسط

كما يوجد بيت الانجليز وهو مكان كان يعدم فيه الناس فى عهد الاحتلال الانجليزى

ومنها متحف الاثار ومزار امنمحات وغيرها الكثير من الاثار

اما المزارات الطبيعية تتمثل فى برنامج سياحى كامل يبدأ من البحرية وهى تسمى رحلة داخلية لزيارة المفتلة والقصر والبركة والجبل الهرمى والغرود الرملية ومروراً بوادى الموميوات ثم الجبل المرصوص والجبل الاسود ثم القرية البدوية ثم المغادرة خارج نطاق الواحات بقليل الى نطاق الفرافرة لزيارة جبل الكهف جبل الكريستال والصحراء البيضاء القديمة والجديدة بمناظرخا الجبلية الجميلة

نتكلم عن المعيشة فى الصحراء الغربية

وبعدين نبتدى نتكلم على المعيشة فى صحراء مصر الغربية والعيشة الصعبة شوية لا شويتين لا لا لا شويات كتير
اولاً دولتنا العزيزة ربنا يخليها وفرتلنا فى الصحراء كل حاجة علشان منهجش منها طبعاً
واحد مفتح يقول وفرتلكم اية يا راجل هية الدولة بتوفر حاجة
اقولة واللهى يا اخى وفرتلنا كل حاجة تاخد مننا فلوس
وفرت الكهرباء وفاتورتها بالشئ الفلانى ولكن واجب ومحدش يستغنى عنها وكمان وفرت التليفون وما ادراك ما التليفون بجميع
حالاتة ارضى ومحمول بجميع موبينيل وفودافون واتصالات وكمان وفرت محطات المياه بس نسيت توفر اللى يشغلوها فالميه تجينى مسبوغة بالحديد ونشربها وادينا عييشبن
كما الدولة مهتمة جداً بالتعليم والحق يتقال جميع المدارس ابتدائى اعدادى ثانوى فنى صناعى موجود والحمد لله
ياسلام كمان مستشفى مركزى كبير جداً بس فيه عناية مركزة وكمان اشاعة مقطعية وحضانات اطفال وكتير من الاجهزة ولكن للاسف الشديد نسيت توفر الاطباء فبقينا بنموت على اتفه الاشياء يعنى هيه الدولة حتجيب دكترة يعيشوا فى الصحراء منين !!!!
مسكينة تلاحق على اللى فى القاهرة واللى فى المحافظات والا اللى فى الصحراء
شوف يا سيدى بلدنا حلوة وده بجد مش هزار ممكن نهرج فى اى حاجة لكن من ناحية البلد فى الصحراء فهى جميلة بجد
فهيه اطلق عليها جنة الله فى الصحراء فيها اكبر عدد من اشجار النخيل فى مصر كلها يعنى خيرها كتير
وكمان عندنا زيت الزتون والزتون بانواعة بس شوية مش زى النخل طبعاً فاحنا البريمو
واهم موضوع عندنا السياحة يمكن تفوق الاقصر واسوان مش فى الاثار ولكن فى الطبيعة نفسها
شوف يا صحبى الواحات البحرية
دى بلد كانت تاريخ كبير جداً فيها سكان اكتر من 40 الف نسمة عايشين عيشة صعبة شوية .............
مشاكههم كتير ومبتنتهيش ولكن عيشين الى ان يشاء الله ويأخدوا استمارة التخرج من الدنيا فيرتاحوا من اللى همة فيه
زى ما عرفت فوق المياه والصحة ودول اهم مقومات عيشة الحيوان اقصدها ما بالك بعيشة الانسان
المهم اهو المية بنصفيها ونقطرها ونشربها من تحت الزير بالنقطة وانت حر لو عندك زير مش بينقط يبقى هتشرب
معدنية طبعاً يا اما استعد لحصاوى الكلى وخلافة ... المهم الصحة اتغلبنا عليها اننا نسافر خمس او ست ساعات
الى القاهرة علشان نتعالج وده بجد واللهى والمريض هوه ونصيبة لو وصل وربنا كتب له النجاه يرجع الخمس ساعات السفر فيعيا تانى مش مهم ربنا يشفية وان مات فى الطريق رجعنابه وان مات فى القاهرة تروح عربية تجيبة ويخصر اهلة كام من الفلوس يعنى مقدار خمسمائة جنيه علشان ينقلوه من القاهرة للواحات بس ربنا يتولنا جميعاً .
نكمل يا صحبى الموضوع
دول اهم مشاكلنا ولكن مش كلها فيه مشاكل احنا اللى بنعملها ودى ظهرت مؤخراً وهيا بيع اراضى الدولة المسكينة ودى هتطرق ليها فيما بعد لما نوصلها
اهل الواحات طيبين جداً وكرم مفيش كده ومؤدة وحب بينهم جميل تتمنى تعيش وسطيهم وده جعل منهم مطمع لناس كتير يستغلو الطيبة وبيضحكو عليهم بامانة وهما سييبين الامر لله يدبر كل حاجة
نرجع الواحات تانى ونعرف عنها بعض اللى انا اعرفة شوف فى البداية كانت تبع محافظة مطروح وده اللى انا بسمعة فقط ولكن اظن انها كانت تتبع محافظة اخرى قبل ميلادى المهم بقى اللى عاوز يتعلم وياخد دبلوم معلمين مثلاً ياخدة من مطروح قبل ما تفتح معلمين بالواحات وفيه عندنا مدرسين كتير دبلومها من مطروح يعنى سفر يعنى اكتر من الف كيلو سفر اسبوع على الاقل ماشى المهم التعليم وبعدين الدولة يسرت الموضوع شوية فخلتها تبع محافظة الجيزة وكنا مبسوطين لان الجيزة 360كم ومطروح تزيد عن 1000كم ومشيت العملية
على هذا الحال ناس على الفطرة يزرعوا زرعهم ويبيعوا منه شوية والباقى للبيت المحلات مفتوحة ليل ونهار امام والحاجة مرمية فى الشوارع بالسنين محدش يجرو ويسرق حاجة ابداً امان يا صحبى امان
المهم دخل علينا الغزوا السودانى اقصد العمالة السودانية وبرضه كان الحال ماشى وامان وبعد شوية دخل علينا الغزوا الفيومى قصدى يا اخى العمالة الفيومية ودى وكستنا بجد والامان اللى كنا نعيشة زمان مبقاش بيبان لان فيهم الكويس وفيهم الوحش فيهم الامين وفيهم الحرامى كانت اليومية زمان بجنيه ورفعوها لما وصلت تلاتة جنيه مش مهم مهى مشية مع الزمن والنهردة وصلت اليومية خمسة وتلاتين جنيه يا بلاش ياريت على كدة دنتى تجيب الراجل اللى عاوز شغل يشرط عليك هشتغل ايه وهتوكلنا كام مرة ويمكن يقولك هتشتغل معايا ولا لا ماشى الحال احنا لحد دلوقتى مدخلناش فى الحاجات المهمة خليك معايا فى الحلقة الجية نكمل المشوار ونشوف فى الواحات الموجودة فى الصحراء اجمل الحكايات .....

فى الصحراء انا عايش

اتولدت من الاول ما اختارتش اسمى !!!!
ولكنى عايش ...
واتربيت ما اخترت منين يربينى !!!!
وزى مانا عايش ....
وكمان ما قدرت اختار المكان اللى انا اعيش فيه ...
مفروض عليا وعايش .......
فى الحر والناس هتولع اكون ماسك كرتونة وبهفى على روحى ومنديل ورق ينشف العرق واهى ماشية
وفى البرد متغطى ببطانيتين ولحاف والبرد داخل من تحت دول كلهم والحال ماشى
عرفت انا فين
فى قلب الصحراء
هناك الحال غير الحال وتشتاق
تتفسح عندنا شوية
اه رأيكم فى الفسحة الظريفة دى
تيجوا اتفضلوا فسحة بس هااا بتشاور مخك عاوز تيجى زى ما اتفقنا فسحة وبس
هتعد هطردك
نبدأ الحكاية